شذرات عامية

4 يوليو
روحي لغيري
صرت ع حدود المسا
روحي شمس ع صبح
يتحمل أسى
يكفي دلع وجنون
صعبة ينتسى
بدي حضن دفيان
مش طفلة
بليلا أحرسا
* *
روحي اتركي هالقلب
يتحمل البردات
هلق اجا تشرين
ودبلت الوردات
غيري ربيعو هل
وطرز مخدات
نامي عزندو وضل
أشعل النهدات
_________________

كانو الصبايا

ع المفارق ينطرو

وبلمحة عيوني

من النسيم بيسكرو

رح تشمتي فيي

لو شمعاتي تكسرو

روحي لغيري

يزرع بأرضك حبق

شو مفكرة بعدي

هالغصون بيزهرو ؟

_______________

حنّي يا دنيا خطي

ع غصة الترحال

حامل بقلبي هم

بيهد الجبال

راحو وتركو جرح

عم ينزف سؤال

يرخص دمع , شو

غالية دموع الرجال

___________________

وين اللي كان القلب

ع بابن جمر

ما عرفت أنه العشق

من طبعو الغدر

شو شبعت النحلات

من هاك الزهر

صار العسل للغير

تركولي القهر

_________________

كان القلب عريان .. بالحب انكسـى

عرّش ورد نيسان ع حدود المسـا

والمركب الضايـع بقالـو سنيـن

شاف حضنك .. وقف وعندك رسى

*
قلي صباح الخير مـا بعـدا كـلام

نظرات عينو كملو حروف السـلام

غامت عيوني .. حسّت الدنيي ظلام

رد القلب بالصدر .. يسعد هالمسـا

*
عمري سنين مـن المحبـة خاليـة

وتعتّـق نبيتـي ع هـاك الداليـة

يا ريح مـرّت ع الدوالـي حانيـة

ووراق صفر من المواجع .. تكنسا

*

______________
ريح الخريف بتحمل وراق الصفر

بتترك شجر عريان وبقلبو قهر

باقي إلو كم يوم وبيخلص عمر

وسنين كانت جوا الحزن منسية

هجرت عصافير الربيع بلادها

وأخدت معها الفرح تيكون زادها

تركت حنين بينتظر أعيادها

وبحة صدى من قلب غنية

لون السما تغيّر بآخر هالسنة

ولف السواد من الحزن كل الدني

من الهم صار ضهري ينحني

يدوّر بقلب الليل عشموع مطفية

2 تعليقان to “شذرات عامية”

  1. مجرد أنثى يوليو 5, 2009 في 12:28 ص #

    ياليل ياريتك تطول شوية
    تيدوب قلبي بقلبو و نكمل الغنية
    و ندوخ عبواب الهوا و نكمل العمر سوا
    ياريتني فراشة وحولو هدي و طير
    أو نسمة عبير ماتفارقو لومهما يصير
    تعب هالقلب ولازم تلاقيلو دوا
    مع ان السر فيك و بتعرفو دايب بالهوا
    قديش قلتلك و بعدني عم عيد
    انت العشق انت الحلم و حبي الك عم بيزيد
    سمعني ولو شي كلمة غزل
    حسسني و لو بشوية امل
    و بعدني رح ضل ناطرة عالمفارق و البواب
    و عن حبك مالي بديل و لو كويتني بالعذاب

  2. قيس يوليو 23, 2009 في 8:22 ص #

    ناطرة عند المفارق طلتو

    يجيب الزهور ملونة بسلتو

    وتحت القمر تحلا السهرية

    والكاس عم يدور ليلية

    يطفي قلب عطشان بالعشق انكوى

    بعدو بيزرع شوق ع دروب الغوى

    شكرا لمرورك سبييت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: